قصيدة زجلية للشاعر المغربي أحمد البوزياني

قصة حب مع غزة

هزيت عيني هزّة
وتمنيت نشوف غزة
وسط طوفان زماني

ولمّا جيت نقدم واجب العزا
من بلاد بعيدة بلهفة المْعَزّة
حسيت بالغربة والزمان رماني

…حسيت بالهزيمة
ملكتني من رجلي لراسي
…عريان بلا رزّة
أبعار المذلة، بدال العزّة
أُبشفايت البعيد والقريب من جيراني

حسيت ببعادها عني
وبعنادها لّي عذبني
حسيت بجبل كلّو هموم

وتذكرت زمان الحب
…لّي فقلبي بقى كتابو موشوم

تذكرت رفاقي
كيحضروني مرٌة..مرّة
ولو فغرق النوم
غسان
معين
ناجي
زياد
ياسر
محمود
…..

لّي مات مغدور
لّي مات بغصة
ولّي مات مسوم

جايين من عروق مراكش بالهدية
رافعين علامات وشعار
وهتافات الحب وإكبار
“بالروح بالدم نفديك يافلسطين”
جمّعنا يوم الارض
جمّعنا شحال من عيد أعيد
وتفرّقنا سنين وسنين
تفرّقنا على القبور
وعلى الاحباس، وعلى المنافي
وعهدنا غنايا
على الحب الصافي

كان عهدنا مع لّي بداو
ومشينا فطريق العزّة
وجاو لّي باعو فينا وشراو
باسمك ياغزة

طلعو طلعو ماعياو
باسمك واسم الرفيق

ما حشمو من دمك
عيونك مايلة بالعيا
عفيفة وحاجبك رقيق

وجاوليكتبو فينا اغناو
بلا صورة وبلا قفلة
وكي سحاب السما مشاو
كالظل بلاصديق

حسبوك همزة بالارقام
ودارو ليك سومة وعلاّو
سهمك جَمْلة
…عند العدوقبل الرّْفيق

…غزة…غزة
سمحي ليا على هاذ الجفا
والجفا من قلت الشّي
،بعدك زادني كيّة
لون نقدر نجهر ما نتخفّى
ولانبخل علك بشي
والشي بالشي شيّة
طالب السماحة، وبعيون الرأفة
غطيني أُبودك رشّي
،وهشّي عليا ضروب القسية
رحماتي على كل من قضا وتصفّا
الصغير والكبير رحماتي على كلشي
من عروق مراكش جيناك بالهدية
طامعين فودك
طالبين أُراغبين